2014年8月16日 星期六

大佬蝕入肉 細佬3招打救



這兩兄弟雖然來自同一家庭,但性格迥然不同。
大哥李嘉俊( Tommy),為人憨厚。他本是 Cova甜品主管,但選擇和朋友開烘焙教室 Choco Bakery。絕招,是「賣大包」:教整餅送朱古力;同事遲到,又不敢出聲。這樣一年下來,蝕了十多萬元。
細佬李嘉銘( Tony),為人多計。他在甜品店及西餐廳做了七年,二十三歲升任主廚,遲早闖出名堂。
眼見大哥 Tommy因生意差夜夜失眠,細佬 Tony決定辭職幫手。細佬加入後,力谷宣傳、重新定價、着重與學生交流。親兄弟偶有爭執,但目標一致:搵錢。三個月即轉虧為盈,現月賺五萬。

人教整餅,佢教整餅, Tommy教到被學生「屈番轉頭」,「咁學生開聲叫我送朱古力『生日牌』、蠟燭、包裝盒等,我咪送囉。點知呢個又要,嗰個又要,有時一班送出三十份!」生性腍善的 Tommy,對學生慷慨,對同事亦寬宏,他解釋:「雖然同事有遲到,但有需要時,佢哋都會幫我開夜班,點話人哋喎!」 Tommy還要「蝦碌」,想搞九十八蚊團購,但食物成本佔了一半,又試過搞錯上堂時間,「我將三班包場客編晒同一個星期五,當日所有人湧上來,我先知搞錯,嚇死!」他唯有低聲下氣安撫客人,再派優惠卡「擺平」,「好彩佢哋肯改時間,無要求退錢咋。」

細佬加入 扭轉局面

簡單來說, Tommy有整餅天分但絕不是做生意材料。月月埋單計數,倒蝕兩萬,一年下來蝕了十多萬元。 Tommy獨力難持,夜夜失眠,兩個月內竟暴瘦了五十磅,他向細佬 Tony狂呻, Tony才知大鑊。他直言:「我真係嚇親!可以成年無錢賺,我唔可以俾佢盤生意咁死落去!」深知大佬好快捱唔住,剛巧 Tony亦工作不愉快,與其出外找工作,不如幫手。細細個兩兄弟已一同輪流煮飯, Tony說:「我覺得唔係大佬啲嘢唔掂,而係無人知佢掂!」 Tony遂使出三招,打救大佬!

第 1招:巧手谷宣傳

人人都知,現時是網上的世界、手機的年代!但大佬 Tommy,竟是電腦白痴。他不懂如何透過網絡做宣傳,開業只懂花錢找人整網站。雖然有 facebook專頁,但永不 update,只得四十粉絲。 Tony對大佬說,無論蛋糕設計幾好都無用:「客人上網見到人氣咁少,對你間嘢都無晒信心!」

事實上, Tommy一直只醉心研製蛋糕款式,記者見他的款式其實頗追貼潮流。近日西餅界大熱的盆栽 Tiramisu、早前父親節的西裝蛋糕、母親節的束花形蛋糕, Tommy都有教。正值世界盃,他最新設計的「足球狂熱」,希望可成為今年暑假王牌。而 Tommy早前設計的旋轉木馬雪糕蛋糕,及外形猶如 LEGO、不同顏色的朱古力,都是「鎮店之寶」。 Tommy有他的堅持:「我要做啲其他人無嘅蛋糕。雪糕蛋糕好少烘焙室會教,因為上堂前要親自打雪糕,花好多心機同時間。」

要令大佬的心血「發揚光大」, Tony號召學生在 facebook密密按 like,並想出藉此提供會員優惠。 Tony又定時在網上發布 Choco Bakery的新款甜品,並用寫 blog形式介紹特色。短時間內就令 facebook會員颷升至四千個。 Tony笑言:「公司的舊網站,客人都取笑設計太老土!」他再花五千元整靚網頁。 Tony又帶着 Tommy走出去,在大型商場擺攤位,去年又參加貿發局美食博覽,「參展蝕咗一萬元,但賺咗曝光率,之後有幾間 café搵我哋做批發生意。」近日他們在觀塘 apm再擺攤位,又吸引一間日本主題餐廳邀請合作。

第 2招:收費不減反加

「佢太有人性,客人叫佢送乜佢都送。」 Tony笑說,大佬做生意還有一個「致命傷」,就是太仁慈。現在除了冰盒外,其他如朱古力生日牌等,一率當配件收費十元。 Tony說:「阿哥唔知道,其實 manpower都係錢。」 Tony吸取西餐廳經驗,將食物成本控制在百分之二十五,故課堂收費由每堂九十八元提升至二百六十多元以上。而批發 cupcake予 café,則由每個十元提升至十五元,一磅半的蛋糕,零售價由一百八十提高至三百元。由於宣傳足,他們現吸引更多包場讓員工學整餅的公司客;這類公司客對使費相對較「鬆手」。

不過市面烘焙教室多的是,尤其他們鋪頭所在的觀塘工廈,同一棟大廈已有六間﹗ Tony為加強競爭力,保留團購優惠,但會先留意行情,避免正面交鋒,「我哋較新,知名度不足,所以我唔會跟同行同時搞,免競爭。我會找行家優惠的空檔才推出優惠。」他指 facebook宣傳可鞏固熟客及公司客,生客散客就一定要靠團購。

第 3招:溝通籠絡學生

開教室這門生意,能否留住客人,最重要在於導師本身。 Tommy雖然盡力與學生溝通,但始終不夠 Tony幽默。上週五,記者參加他們的課堂,就看到兩人明顯的分別。 Tommy一上堂就如教師般,教大家整蛋糕的步驟; Tony則會先介紹自己,與學生互相認識,讓大家熟絡起來。在等候焗蛋糕的時間, Tommy會返回座位工作,默不作聲。而 Tony會走到學生旁,跟他們聊天、說笑,大家經常發出陣陣笑聲。明明兩人想說同一個指令, Tommy明知學生在閒聊,根本聽不到,仍自說自話;相反 Tony懂得在大家靜下時才說,成功引起學生注意。每次落堂, Tony都會主動要求客人影大合照,增加課堂氣氛,再放在網站上,讓同學自行下載相片。

Tony笑言其實兩人的外表亦有影響:「大佬嗰樣比較斯文、靚仔,感覺正經啲。我嗰樣滑稽啲,客人見到我做咩都覺得好笑,或者我似蘇永康係一個優勢!」懂得與學生保持關係,回頭客才多,他們指「翻頭客」約三、四成。遲些還會開初階、進階、深造班等,挑起客人興趣繼續學習。

難兄與難弟

回想創業經過,溫文的 Tommy指,前年獲朋友邀請到烘焙室任兼職導師,初嘗教人整餅滋味,竟然上了癮,於是投資二十萬開烘焙教室。第一堂的火焰雪山雪糕蛋糕,他預備好火槍等製作道具,喜孜孜地等人報名,直到開班當日,竟然只有一位學生, Tommy說:「單對單都要照教,個學生就好開心囉!」

始終做生意要講包裝,幸好有細佬 Tony。他加入後,以前一日只有一班約十個學生;現在平均一日也有兩班,每班二十個學生,另有不少包場活動。三個多月間轉虧為盈。早前 Tommy決定,把一半股份分予細佬。兩人每月只會支自己人工,盈利儲起,並決定於下月搬往一個可容納四十人的新鋪,及在旺角西洋菜街開一間蛋糕用品專門店。

兩兄弟雖相差六歲,但默契十足,經常說只有他們才明白的「外星話」。攝影師叫他們擺 pose,他們不約而同說:「炒朱古力大王!」他們解畫指,是取笑在餐廳廚房工作時,明明無事做卻扮忙炒朱古力的同事。不過,兩人也有爭拗時,他們最初不肯說,但同事阿妹卻踢爆:「佢哋成日鬧交,鬧到好似想打交,但次次都打唔成,轉頭又無事發生咁。」或者這就是親兄弟。 Tony在飲食界有點成績,他歸功於大佬 Tommy,「我讀中一時,見到阿哥做西餐好型,嗰陣就疊埋心水跟阿哥做西廚,佢對我嘅影響好大。」 Tommy亦深知細佬鍾意煮西餐:「我唔想佢只整甜品,希望第日有機會開間餐廳,俾佢整意大利、法國料理。」名字已想好,「會叫做 Choco Pastry。」再問有否說話向對方說,他們不約而同道:「你快啲收工休息啦!」

開業資料( 7/2012)
租金^:$32,000
裝修:$100,000
入貨:$20,000
雜費:$50,000
總投資:$202,000
^三按一上

營業資料( 5/2014)
營業額:$132,000
租金:$8,000
人工#:$40,000
入貨:$30,000
雜費:$4,000
盈利:$50,000
#兩位老闆人工

來源:壹週刊 http://hk.next.nextmedia.com/article/1268/17301674

沒有留言:

張貼留言