2014年12月8日 星期一

全球首推自訂手機殼服務 兩港青創業 拜恩想入股 / Startup先儲經驗人脈



人工五萬、假期任放、每晚任食「翠華放題」,是不少人夢寐以求的「筍工」。兩名土生土長的80後老闆,三年前看準Instagram盛行下的商機,推出全球首間自訂手機殼服務,短短三年間創出每年3,000萬元的營業額,就連NBA籃球明星高比拜恩也計劃向他們投資。他們現正希望以高薪聘請有能之士,開拓下一座網上金礦。

有100萬元的話你會做甚麼?不少港人的標準答案是做首期供樓。但33歲的吳培燊(Wes)和拍檔楊子業(Ron),三年前辭掉高薪厚職,將積蓄來「豪賭」,開設讓用家自訂手機殼的公司。

他們開發的網站Casetify,可以讓用家以自己的相片,設計出獨一無二的機殼,再生產成實物送上門。短短三年已售出30萬個機殼,應用程式下載200萬次,買家遍佈全球130個國家,就連廚神Jamie Oliver、球王美斯和迪士尼影星Hilary Duff都是其客人,更在美國開設分公司。

球王美斯及巴塞隊友幫襯「用Instagram影出嚟嘅相好靚,但只能夠喺網上睇到。當時我哋就諗,有冇辦法畀拍攝者運用創意,將相片嘅價值提升?」Wes在澳洲留學,原是now TV新媒體創作主管,帶領約20人的團隊。他的小學同學Ron則在金融業從事IT工作,兩人都認為有關意念有龐大商機,於是辭職「瞓身」創業。

他們先向各地潮人和名人送贈自訂手機殼服務,在市場無類似產品的情況下,不少人都貪新鮮試用,收到機殼後更自拍上載,成功掀起熱潮,並惹來不少人垂涎,現在全球最少有30間公司模仿Casetify的經營模式,希望在這塊肥肉上分一杯羹,但Casetify至今仍穩坐龍頭位置。Wes認為:「如果對方抄襲完你之後比你賣得好,咁你就要檢討一下原因。」

Wes說不少人收到機殼後自拍放上網,「見到佢哋覺得個機殼靚,好開心咁自拍放上網幾有滿足感」。其次是透過這盤生意成功改善到其他人生活。

Casetify設有藝術家平台,供一些藝術家出售自己設計的機殼,每售出一個機殼藝術家都有分紅,「有藝術家透過平台,一個月搵到三萬幾蚊,之後send email畀我哋話生活得到好大改善,多謝我哋,又係好開心」。

回顧三年創業生涯,最令Wes意想不到是這盤生意讓他和名人近距離接觸,就連球王美斯也是其顧客,「我哋每印完一個殼都有同事檢查有冇瑕疵,有次同事發現殼上面嗰個人好面善,大家一睇原來係美斯同佢屋企人嘅生活照。佢之後一直有keep住訂殼,就連佢巴塞嘅隊友都一齊嚟訂」。

每晚翠華任食 招攬人才

除球王外,籃球明星高比拜恩年初亦曾接觸他們公司,希望洽談入股投資,Wes笑言:「佢搵上門我哋都好意外,佢助手話係見到有人用個殼所以電郵嚟問,唔知係咪佢同美斯拍廣告嗰陣見到對方用。」他指拜恩已近退休年齡,正計劃投資科網公司,雙方現正洽談。

他們現希望聘請設計師、程式編寫員以及市場策劃專員,開展下一個和智能手帶有關的創業計劃,每個職位將招聘兩至三人,人工方面由二萬至五萬元不等,還包括晚上在公司樓下的翠華餐廳「放題任吃」。

至於假期方面,Wes說由於這份工作需24小時處理突發狀況,因此在放假上沒有很大限制,「喺完成到工作嘅情況下幾時放都得,好自由」。有興趣的話可直接透過他們公司網站應徵。

來源:蘋果日報 http://hk.apple.nextmedia.com/news/art/20141129/18951693

====================

Startup先儲經驗人脈

香港社會上流性越來越低,不少年輕人都希望靠科網創業(Startup)闖出一片天地。Wes提醒有意創業的年輕人,Startup的最核心價值,是解決一些世界上未被前人解決過的問題。

他以燒味飯為例,「好似你新開一間燒味店,解決咗附近市民一日三餐嘅需要。但咁樣唔係Startup。Startup係你賣嘅燒味飯時,食一餐等於食三餐,解決你一日要食三次飯嘅需要」。

創業最大難題是甚麼,Wes笑言:「太多,日日都有!」建議年輕人應先工作一段時間,累積社會經驗和人際網絡,鍛煉解決問題的能力才創業,成功機會才較大。

指年輕人缺國際視野

他認為,在香港搞Startup的機會相比外國多很多,「先係稅率低,同時又背靠世界工廠,有好多貨都可以喺大陸用低價錢買入」。他說香港有很多人靠網絡世界發達,只是他們十分低調。

他又指出,現在有不少人「將成條鴨寮街嘅大陸電子產品放上網站同時放上eBay賣,更有不少人直接將大陸嘅淘寶店成間譯做英文放上eBay,一年間搵成幾千萬,只係有好多人都唔知佢哋嘅存在」。

他指,香港年輕人搞Startup的最大障礙是缺乏國際視野,「香港年輕人可能清楚港視劇集播緊乜,但外國年輕人𠵱家追緊Game of Thrones、流行緊乜就好多人都唔知」。

Wes說,只有了解外國人的潮流文化,才能真正掌握到外地市場的需求,一個成功的Startup,「國際視野唔只係其中一項成功條件,而係一個Must。互聯網已經提供咗一個方便途徑畀大家輕易接觸外面嘅世界,係冇藉口話接觸唔到,只係你自己想唔想接觸」。

來源:蘋果日報 http://hk.apple.nextmedia.com/news/art/20141129/18951696

沒有留言:

張貼留言